Ezamiyyə xərclərinin normaları

Nazirlər Kabineti Azərbaycan Respublikasının ərazisində ezamiyyə xərclərinin yeni normalarını təsdiq edib. Nazirlər Kabinetinin saytında yerləşdirilmiş məlumata görə, ezamiyyə xərclərinə aşağıdakı kimi dəyişikliklər edilib:

1. Azərbaycan Respublikasının ərazisində ezamiyyə xərclərinin 1 günlük norması Bakı şəhərində 65,0 manat, Gəncə, Sumqayıt və Naxçıvan şəhərlərində 50,0 manat, respublika tabeli digər şəhərlərdə, rayon mərkəzlərində, şəhər tipli qəsəbələrdə və kəndlərdə 45,0 manat müəyyən edilib.

Ezamiyyə xərclərinə mehmanxana, rabitə, şəhərdaxili nəqliyyat (taksidən istifadə istisna olmaqla) xərcləri daxildir. Azərbaycan Respublikasının ərazisində ezamiyyə xərclərinin müəyyən edilmiş 1 günlük normasının 80 faizini mehmanxana xərcləri təşkil edir.

Müəyyən edilib ki, Azərbaycan Respublikasının ərazisində ezamiyyət zamanı mehmanxana xərcləri barədə müvafiq təsdiqedici sənədlər təqdim edilmədiyi hallarda, ezamiyyə xərclərinin 1 günlük normasının mehmanxana xərcləri üçün müəyyən edilmiş hissəsinin 50 faizi ödənilir.

Qərar imzalandığı gündən qüvvəyə minir.

Kamal Hüseynzadə